繼阿旺阿好，憑肉酸造型紅到發紫，套戲完咗，阿好都重要Keep住哨牙主持節目，可謂娛樂圈奇迹。唔知電視台係咪怕佢哋後繼無人，無綫引入一班台灣「王子」，有線就搵來韓國肥妹金三王旬，醜樣旋風喺香港繼續吹正。但今次真係Sorry，經過一輪街頭直擊，睇嚟肥妹未能變鳳凰，王子重比港人踩到變落難青蛙。
記者︰劉昱蘭
台灣收視贏《流星花園》
實在令港人費解，點解《王子變青蛙》喺台灣的收視，可以打破《流星花園》？《王》的3位主要演員，分別係來自台灣當紅5人偶像組合「183Club」的明道、王紹偉及黃玉榮。佢哋有幾紅？咪嚇親！佢哋有份主唱的電視劇原聲帶，銷量達12萬張。拍MV女Dancers又爭住做Partners，台灣嘉年華開幕，都搵劇集隻青蛙Logo做代言，睇嚟台灣妹真係當正佢哋係完美王子。但《王》劇在香港首播平均得15點收視，年輕人幾乎無人有興趣睇，同一套劇，港台兩地兩種反應。（逢星期日10:00pm翡翠台播出）
劇紅產品多
劇紅就會出好多周邊產品，香港冇得買都俾大家八吓。
觀眾話：
Maggie︰的水難頂
「乜呢套唔係年輕人偶像劇咩？點解佢哋個Look咁老餅㗎？個樣天生唔靚仔都算，個髮型好心就執吓啦，尤其嗰個黃玉榮，長髮露耳想點先，啲的水又核突。」
Elvis︰似龍虎三王
「佢3個好似龍虎門的龍虎三王，粗眉王小虎（明道）、長髮王小龍（王紹偉）、黑實石黑龍（黃玉榮），不過佢哋係惡心版。」
Johnny︰可做茄喱啡
「主角明道又唔可以話佢樣衰，做茄喱啡都綽綽有餘，但擔正做主角又係另一回事，佢做主角就唔夠Sharp囉。」
Jessica︰劇情老套
「劇情本身已經好老套，失憶真係睇到悶，重要同劉德華電影《與龍共舞》一樣，有錢仔變非法入境者，加埋樣唔吸引，真係冇理由去睇。」
《金三珣》肥妹襲港
睇嚟套《王子變青蛙》都係滑鐵盧多，另一套唔Sell樣嘅韓劇又點？韓劇《我係金三珣》剛在有線播完，反應亦只是一般。主力描寫一個肥女孩在感情及事業路上的起跌，聽落似《BJ單身日記》，在韓國收視亦勁爆，主角金萱兒紅到發紫，喺韓國最受歡迎女星選舉，第二名得幾千票，佢可以以16,000多票奪冠！《我》劇個角色擺明Sell性格Sell劇情唔Sell樣，但紅起上來可以令韓國各地舉辦多個「金三珣」模仿大賽，女角更擔任多個品牌代言人，身價飆漲。套劇喺香港啱啱播完，但反應麻麻，記者喺信和相舖逐家拍門，淨係搵到好少佢應Prada邀請到香港時裝騷的相，重要係同場有多位明星，佢只係做布景板嗰隻！
觀眾話：
Oscar︰唔開胃點睇
「我成日都見到有線一日重播幾次，絕對唔係時間唔夾所以唔睇，而係見到佢咁肥，真係一啲吸引力都冇喎。睇劇集都係旨在娛樂開心，角色唔靚唔開胃咁又點支持呢？」
King︰肥咗實走樣
「女仔肥咗實走樣，套劇預咗要谷肥個女角的話，好心就搵個好樣少少，咁走樣極都重可以有啲揸拿。」
Eva︰有共鳴
「佢係要特登犧牲增肥配合角色㗎，咁睇落先有共鳴嘛，我梗係支持佢，主角肥得可愛，配角Daniel又靚仔。」
Becky︰OK順眼
「套劇個賣點係平凡人的故事，咁佢要有個肥Look先至入型入格。而且佢都OK好順眼。」
李力持：外購劇先天不足
據導演李力持話，喺香港乜都要Sell樣，好似樂壇都係偶像派玩晒，香港自己絕少拍醜人擔正劇集，好難先會爆到一個阿旺出嚟，香港人睇外語劇重多咗層隔膜，效果梗係麻麻。「一套外語劇的成功元素，好難憑唔熟悉的語言，或者靠配音Keep得住，流失咗原汁原味，喺當地幾紅都冇用。加埋重要港人唔多識啲演員，重要係醜樣，好易觸礁。」
一套醜樣劇集，角色性格同造型就幾乎係一切。李導演︰「好似阿旺咁，角色憨直天真，愈儍氣愈得人心。另外講造型，當家花旦大家都睇到悶，阿好醜到絕囉，咁咪產生到新鮮感。」
