喺屋之島打工，最開心莫過於辛苦過後，可以同班同事免費大吃大喝。屋之島老細，習慣以美食表揚班表現出色嘅同事，既可以滿足口腹之慾，又可以畀機會平時衝鋒陷陣嘅員工，拋開工作，舒舒服服坐埋一齊，互相交流吓心得。
好似上個禮拜六，屋之島豪宅部一行近二十人，齊齊去咗澳門，過咗兩日一夜嘅美食之旅，入住位於黑沙灣五星級酒店威斯汀。全晚嘅戲肉，就係去到澳門一間由法國米芝蓮三星廚師主理嘅餐廳，食咗餐法國大餐。呢餐飯食足幾粒鐘，埋單足足係一般打工仔成個月嘅人工。
之後，佢哋再去酒吧輕鬆吓，先至返酒店休息。
第二朝喺酒店嘅園林餐廳歎完豐富早餐之後，有同事提議，去玩緊張刺激嘅小型賽車，食咗咁多好嘢，出番身汗、消化吓，都好應該，於是全體落場玩番轉先返香港。
唔知係咪充電之後，做嘢特別落力醒神，玩完之後，第二日返工，即時開咗兩張單，員工咁識做，老細下次唔怕請。
電郵地址：[email protected]