大市繼續牛皮，中資股調整幅度則較大，上升股同下跌股（都不計認股證）數目相若，約350隻，基本上係個別發展之局。
近期表現大強勢嘅股仔，明豐珠寶（860）係其一，噚日高收0.49元，升10.1%，成交有3200多萬股。本月初，明豐由0.33元起步，幾日間，升到上0.50元，後調整到0.44元，形成上升三角形，噚日再破位而上，照度上去，目標係0.62元。
明豐「晒士」唔大，發行只6.5億股，市值不足3.2億元。一家市值只3億多、大股東又持有64%股權的小公司，最重要係本身有盈利支持，而財況又好健全，呢類「細細粒」嘅公司，其「轉型」或「轉手」嘅「可塑性」真係好高，近期明豐股價有異動，市場當然亦有唔少令人產生憧憬嘅傳言。
明豐經營珠寶業，以出口為主，最大市場係美國同歐洲。05年度（9月年結），營業額4.3億元，升21.4%；獲利5418萬元，升15.3%，每股盈利8.3仙；全年派息0.8仙，升6.6%，派息比率不足10%。
基本條件佳揸得安心
盈利增幅較營業額低，主要係市場競爭激烈，珠寶售價下調，令全年毛利率由前的30.9%跌至28.2%。集團致力開發首飾品牌Savanti，並打開中國市場，分別在上海開設3間及在杭州開設1間零售店，公司計劃再在大城市開設更多店舖，預期中國市場可在現年度開始提供貢獻。
由於環球經濟改善，集團在國際珠寶展覽會取得更多定單，預期現年度業績會有改善，估計盈利升到6500萬元，每股盈利10仙，預測PE4.9倍，非常吸引。
「轉型」或「轉手」傳言會否成事，要看事態發展，但公司PE低，業績穩定，而淨借貸（去年9月底數字）只係1400多萬元，確係屬於揸得安心嘅對象，起碼「進可攻、退可守」。
個別股票方面，早輪推介嘅中國糧油（506），噚日高收4.525元，大行買盤仍然好活躍，此股現時應該重係在收集階段，每次升後嘅調整，都可以趁機低吸，由於可能會有重組或股權變動嘅大動作，若作中線持有，獲利幅度會好可觀。
郭兆誠