最近大狀個個諗組黨，大狀黨要組黨，工聯會大狀鄺志堅又要組黨。鄺大狀話，希望可以同啲溫和民主派，組個同工聯會、大狀黨同民主黨都冇關嘅「中間黨」，打破目前左右對壘嘅局面，如果吓吓都係廿五對卅五嘅僵局，咁就乜都做唔到，香港死梗啦。嘩！連中間選民都攞埋，左派真係有殺錯冇放過。
鄺大狀重話，初步同幾個一人民主派傾過，有幾個都覺得可以咁做，李卓人就難搞啲，但石哥同梁耀忠，同北京唔係話完全有偈傾。
佢噚日重提咗政改方案，特首選舉最快可以一二年普選，不過要先取得十個人大提名先有得選，確保北京信得過候選人。立法會就每屆取消十席功能組別，咁二○年就可以普選囉。
喺左派裏面，鄺大狀都算係比較右嗰個，就連最溫和嘅石哥都未必騷呢套啦，睇怕個新黨都會難產啦。
傳真︰2623-9278
電郵︰[email protected]