港股近期走勢反覆，強勢股如建行（939）亦在高位彈上彈落，過往估頂奇準的大劉又趁高減持華置（127），大手套現十幾億，近日又不時有股份突然大插水，前日有中盈（766）及創維（751），噚日又有中國水務（855）急挫20%。以上種種情況，令阿虎懷疑是股市大調整的先兆。
i師傅叫阿虎唔使擔心，事關個市一路升，一路有客問佢幾時見頂，甚至有啲客已一早減持。換言之，呢次升市，尚未到達全民瘋狂的地步。特別是內地金融類股份的升市，其實升得好實淨，唔多似係泡沫，而最緊要係現時銀行水浸，市場游資仍多。
西王糖業（2088）早前炒上4.025元後見頂回落，噚日跌勢加劇，股價大跌9.5%至3.075元，成交高達1.03億元。建行前日創3.85元新高後，噚日遭質低3.4%至3.55元，成交高達28.9億元。
大和睇H指8000點
不過，日資行大和做咗H股大好友，話H股指數可挑戰8000點。大和睇好內地金融股，估計建行與交行（3328）未來仍會跑贏大市。
筆克遠東（752）噚日派個靚靚成績表，全年盈利勁升168%至1.21億元，刺激股價大升7.84%至2.75元。其實呢個業績早在摩根大通預期之內，現時股價已升超過摩通的目標價2.60元，唔知摩通會否叫客戶趁高減持呢?
日本信用（626）以45億元高價收購亞洲商業銀行，市場隨即追捧有機會併購的中小型銀行股，其中廖創興銀行（1111）跑出，股價一度炒高11%至16.80元，收報16.20元，仍升6.9%。
阿虎