香港地養錦鯉嘅人好多，但養到出晒名嘅，應該非煲呔莫屬。但原來政界入面都有人好鍾意錦鯉㗎，不過佢哋冇煲呔咁高調表現佢嘅「狂迷」一面啫。
呢個錦鯉迷，其實係馮檢基KK。KK喺養錦鯉圈子裏面重巴閉過煲呔，因為佢係香港錦鯉會嘅名譽會員，自己都特別喺屋企後面整個魚池，安置佢嘅心愛錦鯉，唔係淨係煲呔先有魚池㗎。
錦鯉會計劃趁香港回歸十周年，搞個國際錦鯉節同比賽，主禮嘉賓呢個位，煲呔唔做都冇人夠膽做啩，不過煲呔重未決定去唔去，只係叫KK攞個計劃書嚟睇睇。
咁呢位錦鯉專家，又點睇煲呔養錦鯉層次？KK話煲呔啲錦鯉算小兒科，因為最貴嘅郁啲過百萬一條，煲呔嗰啲冇得比。但佢都力撐煲呔好有經驗，佢話錦鯉真係識認人，如果見到主人走近，一定唔會游咗去；相反係陌生人，就走夾唔唞，怪唔得唐唐年初一去到禮賓府個魚池，啲錦鯉騷都唔騷佢啦。
傳真︰2623-9278
電郵︰[email protected]