見到馬局長，記者梗係唔會咁輕易放過佢，點知佢一味耍太極；問佢證券事務，佢就叫人去搵同場嘅周文耀，問佢稅務同預算案，佢就即刻拉住劉太，話自己唔識答，要劉局長答。正經事唔講，咁問佢情人節點過，佢就好開心，話梗係同太太過啦，不過齋食飯，無送禮，因為啲花太貴喎！
至於近排曝光率高企嘅范鴻齡，喺酒會一見到劉麥懿明，就好熱情咁打招呼；佢同華華講，自己同劉太兩公婆識咗好耐，劉生同佢係港大同班同學，而劉太就低幾班。
酒會場面咁熱鬧，最開心梗係會長陳茂波！好多人都知佢同太太感情好好，情人節除咗食飯同送花之外，重送咗個公文袋畀老婆，事關陳太之前唔見咗個袋！
李華華