雖然曾經因為寶蓮寺用地問題，同政府搞得好唔愉快，但出咗家嘅釋智慧法師，明顯重好了解入世技巧，事關智慧大師噚日猛咁擦行情看漲嘅煲呔鞋，話自從煲呔上任後，政府同寺方關係出現曙光，又話煲呔喺好多場合，都有同佢傾偈，講到煲呔真係好好咁。
不過，有時又不得不讚煲呔嘅公關技巧，因為政府最近確實已經就天壇大佛對開廣場用地嘅管理問題，同寺方達成協議，重同意將塊官地交畀寶蓮寺管理，即係主導權喺寺方手上啦。
再加上政府又就萬佛殿重建問題，同寺方達成共識，尤其提出咗一個補地價金額，𠵱家只係等待寶蓮寺董事會開會通過咁簡單。
一個又一個甜頭咁送上門，智慧大師又點會唔冧吖，佛教喺選委會嗰十票，睇怕煲呔都可以袋袋平安。
傳真︰2623-9278
電郵︰[email protected]