恒指波幅得59點，埋單進帳27點。滙控（005）低息搶樓按生意，對地產股心理利好，信置（083）1股當先，升6%，信置有隻C輪9172即日彈升94%，另外隻9201亦漲63%。信置C輪唔多，交投亦奀，好難炒。
地鐵（066）有地產成份，結果跑贏新地（016）、長實（001）、恒地（012）及新世界（017）。
地鐵C輪9196：地鐵升2.2%，收16.45元，最高價16.60元，平上月中高位，成交由3.8球大增至10.9球。芬佬銀彈掟落去，個勢未完。
搵地鐵C輪短炒，正路對象係9196，昨日有33球易手，唔怕轉唔到手。隻輪10月中夠鐘，輪價25.5仙，溢價3.2%，槓桿率6.5倍（有效4.9倍），引伸波幅27.8%。嫌唔夠爆，向6月尾到期嘅9073埋手。
長實C輪2155：長實收78.85元，升0.3%，大隻地產股中升得最少嘅係佢。如果繼續有其他銀行加入樓按搶奪戰，地產股會有進一步刺激，長實亦會跟番大隊上去。
搵長實C輪短炒，可揀2155。隻輪7月初到期，輪價45.5仙，溢價7.2%，槓桿率17.3倍（有效8.4倍），引伸波幅27.6%。另1隻可以考慮嘅係9871。
章盛