嘉亨灣事件曝光後，已經退休嘅前屋宇署署長梁展文仍然係傳媒焦點。前日立法會政府帳目委員會發表嘅調查報告，就披露梁展文曾經有意邀請佢老友、房協主席李頌熹出任觀察員列席建築事務監督會議。李主席噚日同傳媒新春團拜被問起件事時，直言唔知道有件咁嘅事，重話房協同各地產發展商有好多合作，就算當時真係接到邀請，相信都會避嫌婉拒。佢話同梁展文相識多年，知佢心情應該平復落嚟，但係立法會出報告之後就未有聯絡對方。
李主席重提到好多房協今年嘅大計，包括同政府商討下年再次售賣單位，以及分批推出單位等意念。不過，相信最令房協同事鼓舞嘅，就係主席暗示房協員工今年應該有望加薪，會按市場趨勢調整幅度，細節重要等薪酬研究委員會開會後先落實。
傳真︰2623-9278
電郵︰[email protected]