新正頭大家都想攞個好意頭，最實惠梗係有錢收！環亞物業本月二十號舉行拍賣會，會送出利是及黃金。
凡曾經睇過樓又喺當日出席拍賣場嘅頭五十個客，都可以獲贈新年利是。
同時，當日投到單位嘅又有得參加抽獎，獎品除咗兩座足金十二生肖外，重有由銀主送出嘅幾座四吋半珍藏版金財神。
呢次拍賣會共有四十五件貨拍賣，大部份係新界樓，最貴嗰件係渣甸山松風臺住宅連車位，實用面積近千六呎，開價一千三百八十萬。
拍賣行搞新意思，目的係想引起買家注意，多啲人嚟拍賣場，成功賣出物業嘅機會就高啲。所謂「小財唔出，大財唔入」，係咪呢個意思呢？