記得開會有以下大輪爆笑質疑：「木瓜釀牛丸？重嚟多個梳乎厘蟹皇番茄忌廉湯底打邊爐？怕唔怕食到絞腸痧？」Fusion風氣愈吹愈盛，呢間「美味廚」玩嘢程度就更加爆燈，大膽推翻打邊爐唔係清湯就係麻辣嘅定律，傳統小菜都溝得好精采，九唔搭八？係呀，不過正咪得囉。
記者：盧家蕙
攝影：譚盈傑
模特兒：Becky（Salvador）
裝潢正常出品搞鬼
「美味廚」隱身灣仔商業大廈5樓，裝修唔算高檔勝在新淨寬敞。坐低，睇餐牌，火鍋湯底有甚麼火燄法國青口湯、蘋果粟米雪耳唐排湯、紅酒牛尾湯等，最出位要數梳乎厘蟹皇番茄忌廉湯，唔講重以為係餐前西湯。
負責人話：「唔搞吓花臣吸引唔到食客，湯底唔係亂溝一通㗎，全部試過度過先推出，玩Fusion啱晒年輕人。」梳乎厘吹彈得破似有還無的輕柔質感已經令人回味，混番茄忌廉和花蟹，唔係講笑，真係香到想飲番碗。
梳乎厘蟹皇番茄忌廉湯$88
賣相精美得像客放大了的西湯，拮開軟綿綿梳乎厘，把它往用豬骨與雜菜熬成的番茄忌廉湯裏浸，口感順滑，加入花蟹令湯底鮮味倍增，不太濃稠入口卻香濃無比。
好味配料
新鮮靚牛肉
全店提供14款牛肉中，上起澳洲和牛面珠肉（$128）質地嫩滑唔嚡口；M12和牛（$260）脂肪分布均勻，頂級美味入口即溶；本地雪花金錢𦟌（$88）亦很爽口，不妨一試。
亂溝水果丸每款$48/10粒
上起木瓜釀牛丸、車厘茄釀墨魚丸、芒果釀豬肉丸全部即叫即打，咬開熱騰騰的肉丸，彈牙爽口中包裹着微溶的鮮果粒，鮮肉與果香交織在一起，少了飽滯感，感覺清新健康。
紅酒牛尾湯$88
10斤牛骨、10斤牛肉加牛尾熬數小時，湯底牛味四溢，點點酒香更叫人陶醉，加埋青紅蘿蔔、唐芹的點綴，成了色香味俱全的湯底，舀碗來喝都唔錯。
盞鬼小菜（每款午市各$48，晚市各$68）
梳乎厘梅菜扣肉
賣相只能維持數十秒，因扣肉熱力會令梳乎厘逐漸塌下，好騎呢不過食落幾盞鬼，鬆化惹味的扣肉配甜滋滋梳乎厘，送白飯唔錯。
百花蟹肉翅水蛋
蟹肉和翅覆蓋着整個水蛋，滑得直跣喉嚨，「魚翅」要花點時間咀嚼，這只是素翅，不過像真度極高，口感彈牙絕對呃到食客。
咕嚕柚子蝦球
雞球沒有了，取而代之是爽口鮮甜的蝦球，值得一讚的是以柚子代替菠蘿，柚子獨有的酸澀味道很醒胃，比甜到漏的罐頭菠蘿更出色，蝦肉鮮味更突出。
食客有Say
美味廚（28668305）
地址：灣仔道165至171號樂基中心5樓
營業時間：12:00nn-11:00pm
座位：100個
