陳奕迅（Eason）近日忙緊喺紅館舉行演唱會，但佢亦同時要為新推出嘅EP做宣傳，仲做埋設計T恤，真係周身唔得閒。今次佢張EP嘅主題係延續演唱會主題《GetALife》，所以碟名叫《LifeContinues》。
徐濠縈客串獻唱
Eason話大碟主題意思係生命嘅延續，佢個女出世就係一個生命延續嘅好例子，因此呢隻碟用咗平時幫囡囡拍低嘅生活相做唱片封面，碟入面佢重寫咗首新歌《大得太快》畀個女，而佢愛人徐濠縈亦有喺碟入面《人車誌》呢首歌度客串獻唱，出動晒一家三口嚟谷新碟。
Eason一直都鍾意着一啲有口號嘅T恤，所以同佢有合作過嘅網上行就搵Eason合作設計一件tee，喺衫寫住「musicismywife」，意思係音樂係我老婆，Eason話音樂等同佢家庭一樣咁重要，當日件tee新鮮出爐，網上行便即刻去咗錄音室搵Eason試着同拍咗佢平時喺錄音室嘅生活片段㖭。
