澳門經濟勢頭好，市民置業信心強，農曆新年後，買家紛紛出嚟睇樓，集中搵啲平價單位，一百萬以下零舍受歡迎。業主見氣氛好，乘機加價。
中原（澳門）今個月以嚟嘅成交，五成八係買一百萬以下嘅單位，一百萬至二百萬有三成八。過去買家較重視樓齡、屋苑配套、周邊交通同環境，作為入市嘅主要考慮因素。
但近期情況有啲唔同，買家取態開始着重價錢及實用率多啲，就算樓齡高都唔介意，所以近排成交嘅單位，唔少樓齡超過二十年。
中原吳志明話，氹仔花城一個高層單位，農曆新年前叫價一百六十八萬，𠵱家就要一百八十萬至肯賣，加價七巴仙，反映業主對後市樂觀。
佢話，新口岸一帶新盤供應少，估計買家會轉投氹仔區，特別係年輕一族，令呢區樓市繼續好熱鬧。