噚日特許公認會計師公會（ACCA）下晝就揀咗喺IFC嘅Red搞露天茶敍，最熱門嘅話題都係講下星期預算案財爺有冇糖派；唔少會計界人士都估計有盈餘，華華就揀咗兩個代表人物嘅預測畀大家參考。
ACCA會長鍾維國（圖左）話，估計盈餘應該會有100億左右，呢個數係依據12月公布嘅數據，加埋1至3月嘅估計得出。羅兵咸永道嘅合夥人雷添良就笑笑口話，佢估會有280億盈餘。在場嘅稅局局長劉太一聽，話到時冇呢個數，就由雷生填！
華華同好幾個會計界高級人馬傾開偈，佢哋都話今年行內好景咗，人手流動大，請人又難，最搶手就係3至5年經驗嘅。
有部份大行為咗吸引新人，現有員工成功轉介親朋入行會有佣收。ACCA副會長周雪鳳（圖右）同華華講，聽過有行內人收佣嘅數目，等同於幾個月糧咁多！