楊千嬅和任賢齊早前拍攝新片《天生一對》，講述她為洩憤狂打小齊，但因為沒有打人的經驗，拍攝時千嬅不懂用力，狠狠打完小齊後，手骱移位，需要看跌打。
楊千嬅和任賢齊最近合演杜琪峯和愛徒羅永昌執導的新片《天生一對》，千嬅扮演患乳癌的少女，以樂觀和積極態度面對癌魔。
千嬅日前拍攝一場睇病被神醫欺騙，然後追打小齊洩憤的戲，她知道要拿手袋狂毆小齊時，一臉無奈說：「我到呢個年紀都未試過打人嘅經驗，真係唔知道打人係點，叫我點落手呢？」羅永昌竟取笑千嬅：「睇你個樣一啲都唔似。」
打得辛苦
到拍攝時，因為千嬅打得很輕手，導演不肯收貨，小齊見狀即說：「你出盡力打我，我係唔會介意嘅，你睇我啲肌肉幾結實，所以你點打，我都唔會覺得痛。」後來千嬅終於狠狠打小齊，一共拍了五次，導演才肯收貨，千嬅事後說：「我𠵱家先知道打人原來咁辛苦，我隻手已經用唔到力，好攰同有啲痛呢！」千嬅因拍這場打人戲，需要睇跌打，醫生指她手骱移位。
此外，農曆新年期間千嬅與家人到日本旅行，順道慶祝生日。原來千嬅的好友打算為她開驚喜生日會，故臨時叫她以盛裝打扮到一間高級古堡法國餐廳食飯，豈料千嬅和父母都沒有準備合適衣服，惟有臨急買衫。
日食七餐
千嬅說：「我哋要四圍搵衫，都唔知會咁詭異，事前六個鐘頭去買衫，跟住又要幫媽咪同朋友化妝、set頭，足足搞咗三粒鐘，真係辛苦過做台慶，但係同佢哋整就好有滿足感，反而自己最後買唔到裙，重搞笑到同啲侍應撞衫㖭！」
千嬅又表示此行很輕鬆，她說：「我哋一日食成七餐，乜嘢都試吓，自己好小心控制食量，每樣都係食少少，因為媽咪驚皮膚敏感，所以冇浸溫泉。」
採訪：駱華齡
