踏入○六年，美聯一口氣擢升二十四個前線，四個晉身董事級、七個區經、十個高級營業經理、其餘三個上分行主管位。
十一個區經級以上嘅升職員工中，香港新界各佔四個，九龍三個。
美聯執董陳坤興宴請佢哋食餐勁，席間醒佢哋幾招，講吓市場走勢及管理心法，鼓勵佢哋訂立生意額目標。食完呢餐，大家肯定獲益良多。唔知美聯今年生意額係咪會再上層樓？
講番對手中原，港島東喺日前春茗上，定下今年生意額目標一億五千八百萬，比舊年一億二千二百萬多近三成。
另外，舊年生意額係七百五十萬嘅中原天水圍嘉湖銀座二期分行，高級分行經理黃海就話，今年希望晉身為千萬元分行。佢哋上個月做到二十六單成交，成為最多成交分行冠軍，向目標邁出一大步。