方力申、吳佩慈和鄧麗欣（Stephy）前晚在尖沙嘴出席電影《獨家試愛》的慰勞宴，前日是情人節，記者要求二人錫男主角方力申，但二女卻甚怕醜，只願嘟嘴作狀，就算方力申說明前日是他的農曆生日，兩女仍不為所動。
自認身材冇得谷
提到衣着不及吳佩慈性感，Stephy笑說：「都冇得谷啦。」吳佩慈曾表示自己的乳暈是粉紅色，Stephy聞言說：「我冇睇過，亦唔慣裝人換衫。」戲中Stephy和方力申有咀戲及掌摑戲，問Stephy覺得對方的技巧如何，她笑說：「佢又咀得，咀嗰時都OK狼嘅，又摑得。」
此外，方力申昨日到機場出席歐米茄奧運計時歷程展覽會，提到六月將會到上海出席歐米茄110周年活動，更有機會與妮歌潔曼（NicoleKidman）見面。他說：「我同黃柏高（Parco）講咗hold住六月啲工作先，因為我點都要同佢見面，我同佢嘅身份都係名人大使，大家平起平坐，我會送隻新碟畀佢。」
問到前晚情人節如何度過時，方力申笑說：「做完嘢返咗屋企啦。」問到會否欣賞緋聞女友鍾欣桐主演的《犀照》時，方力申即說：「我會買飛入場睇，支持香港電影同朋友嘛，馮德倫以前同我同公司，兩個都係我朋友。」
採訪：魯萍、藍文浩 攝影：林德雄
