呢排買股票，買穩陣藍籌公司股，好難賺錢。當然東亞與中華煤氣都升得幾好，但長實、和黃、兩電、滙豐、中移動等等，買咗之後，唔蝕錢算你夠運，就算唔蝕，機會成本都好高，譬如投資W買入十手滙豐，用五十萬元，至今冇賺冇蝕，佢話如果呢五十萬元用嚟買咗建行（九三九），已經賺到飛起咯。故此佢狠心沽掉滙豐，改買中字股。
經紀Ｋ話：「買中字股係賺錢賺得快，譬如左丁山喺一月二十二日寫嗰堆股票，到𠵱家已經升咗唔少，夠鐘獲利回吐，回報率有兩三成咁滯，買中字股要識得落車喎。」翻查當日本欄，啲股票包括三三二八（交通銀行）、二六二八（中國人壽）、二三一八（平安保險），一○六八（雨潤食品）、二○八八（西王糖業）。」
經紀Ｋ繼續潤左丁山：「譬如西王糖業，係做葡萄糖嘅，與原糖期貨價格上升無關，但左丁山竟然推介，股價由兩個九升到三個八毫半，升幅有三分一。你正一係盲俠。」左丁山為之失笑，總之買中字股就可以雞犬升天，講運氣多過講研究。升咗二成以上嘅股票，獲利回吐永遠冇錯，此之為識得落車。再睇番一月二十二日段稿，講及二八二（壹傳媒）派息三毫之後，企硬三元八角二仙半。於是立即仄吓寫呢段稿時候嘅現價，唉吔，竟然係四個五毫半，升咗17.6%，問你服未，睇嚟，壹集團之內，撞埋都係百萬富翁，恨死人。香港一百五十年來，幾時見過報紙雜誌集團嘅打工仔編輯可以發成咁㗎，肥佬黎除咗創富，重創造埋香港傳媒歷史。
買中字股嘅最大風險就係唔知佢哋嘅管理層係乜東東，主席、CEO隨時會被「雙規」，買得多，唔敢去放假而對股票不聞不問。經紀Ｋ話幾隻國企大公司可以加入恒指，剔除東亞、德昌等，改組後嘅恒指，因有中字股因素，升到上一萬八千點，未必有難度。