豪裝公屋唔係新聞，不過，屯門建生邨呢伙豪成咁，就好少見。呢個四座低層，引到買家肯以高市價一成六購入。究竟點豪法？
首先，三房改四，地下鋪白雪雪意大利磚，全屋分體式冷氣，窗框改成格調高貴嘅鋁質加隔音雙重玻璃。咁都未算，唔夠八百呎嘅空間，共有五十二個燈掣，可以想像，間屋有幾多唔同嘅燈飾。裝修費二十萬，相當於屋價逾三成。
裝修師傅話，一般裝修費係樓價一成左右，如果去到三成，確係重手。
唔怪得單位賣到咁好價，業主○四年中以六十二萬連補地價買入，以九十萬放盤，以近八十二萬成事，單位七百七十四呎，呎價逾千，創屋邨新高。業主賺二十萬，不過扣番裝修成本，就冇乜錢執。
電郵地址：[email protected]