呢輪官場好多傳聞都似是而非，好似話周達明本來真係想派去做新聞處處長，點知咁啱佢太太謝曼怡又獲升做行政署署長，冇理由兩個一齊升，於是先讓邱騰華上位，唔使佢上京，真係執身彩。
至於衞福局個新常秘位，以前傳過由黃灝玄做，後來黃公公要頂黎高穎怡，於是又要搵人，結果有人傳煲呔前任新秘馮程淑儀，但係馮太只係D3，點可以一步上天做D8位呢，雖然話煲呔乜都得，但係馮太前面仲有鄭汝樺、王倩儀、陳甘美華，應耀康等一大班前輩，咁樣爬頭超前肯定有反彈。鄭汝樺都一樣係煲呔愛將，佢做合理好多。
另一個搞錯就更奇，肥龍上周三生日，話咗唔會大搞，當晚只係請咗契仔陳德霖同太太、一個醫生朋友、廣告界朋友以及位表哥去白加道府邸食飯，並冇請商界新知舊雨同埋富貴黨頭頭田少，唔知點解有咁傳聞。有人估，田太同肥龍同月同日生，又係白加道街坊，可能有人誤將田太作肥龍。
傳真︰2623-9278
電郵︰[email protected]