日股大跌252點，港股受拖累跌過103點之後，埋單仍有2點進帳，市底硬淨，有平貨要先上車。
全城焦點繼續集中喺建行（939），大市每10蚊成交金額，就有1蚊係建行，最高3.85元，收3.675元，升1格。建行9RSI已經上到92.5，好超買，點都要唞唞氣。上個月不斷推介C輪9978同2104，𠵱家賺到笑，仍然喺手嘅散水可也，冇貨喺手嘅咪高追。要賭，都等9RSI跌低先至諗。
恒指C輪9717：大市近期每次跌落去，都彈番上嚟。𠵱家個位值唔值得買，屬於兩睇，但耐唔中忽然整低百幾點嘅話，則入市博反彈比較有揸拿。吼平買恒指C輪，對象係9717，隻輪4月下旬夠鐘，輪價18.4仙，溢價1.7%，槓桿率22.4倍（有效14.5倍），引伸波幅17.5%。
隻輪到期之前，包括滙控（005）在內好多隻藍籌除息，拖低恒指，所以隻輪實際溢價超過3.5%，唔算平，所以隻輪係用嚟炒唔係用嚟揸嘅。
中電信C輪9796：中電信（728）收2.95元，跌1格。吼住再跌一兩格，買C輪9796。9月初到期，輪價37仙，溢價4.1%，槓桿率8倍（有效5.5倍），引伸波幅28.9%，理想買入價係33-34仙。
章盛