噚日去咗民政事務局個新春酒會。講真，呢啲又係大家見見面講幾句握握手飲完酒就走嘅無謂嘢。不過呢個政府官員同文化界各路英雄人山人海共聚一堂嘅場面反而令我諗起去世冇幾耐嘅郭伯偉。
啲人講起郭伯偉一定會講到佢堅持大市場小政府點令到香港經濟起飛，呢樣嘢唔使我多講，之但係我又好想知假如佢重在生，而又由佢主理香港文化藝術發展，佢又會點睇同點做呢？佢會點睇教育呢？
𠵱家香港嘅文化藝術發展其實係小市場大政府。政府投放喺文化度嘅錢大概每年二十幾億。其實唔少錢用咗嚟養一班藝術官僚，真正畀藝術家嘅唔係好多。講真，喺劇場做帶位嗰個生活會安定過做戲嗰個（嗱，我唔係話帶位唔緊要呀吓），而且重有戲睇喎。
表演藝術委員會出咗本橙皮書叫人畀意見。我就建議佢哋向郭伯偉學習，將文化藝術發展定位為大市場小政府。啲人對橙皮書嘅反應係換湯不換藥。計我話，最好生一個由民間主導嘅機制，thinkoutsidethegovernmentbox。
西九其實係一個幾好嘅機會去改變現狀，之不過𠵱家政府同立法會鬥緊氣。鬥還鬥，要地產商畀三百億呢樣嘢一定要堅持。
三百億喎，幾好使㗎，如果識使嘅話。
觀火
傳真︰2623-9278
電郵︰[email protected]