昨日小初同班經紀老友爭相打電話四圍問，想知隻創維（751）同埋中盈控股（766）為何突然大插水，原來係各有原因。
創維噚日失驚無神被大盤質落至0.60元，收市雖然彈番上1.18元，但仍大跌14.49％。至於中盈，晨早出現兩手大成交上板，起初都冇乜嘢事發生，股價更最高見過1.38元，但臨食飯前勁插水，最低跌至0.80元，收市報1.13元，跌11％。
根據經紀黃嘅版本，創維急跌與某個基金出貨有關，但唔明白點解佢哋唔慢慢滲貨，要一鋪清袋咁激。至於經紀陳就話，中盈朝早的大手成交，係有外資基金要貨，但有人見到就乘機出貨，搞到個場亂晒籠，認真唔夠義氣。
另外，首長國際（697）昨日公布向意大利企業配股後，復牌最高見0.66元，收0.62元，升6.9％。呢系股份在近期中資股的升浪中大落後，市傳首長國際今次配股引入策略性股東後，會有動作跟尾。
經紀黃話同系嘅首長寶佳（103）亦要留意，據聞稍後亦會有動作，昨升5.6％，收0.56元。
慕容小初