來自內地鐵道部運輸局嘅消息話，京滬直達特快火車推出嘅「女賓軟卧包廂」服務，喺前日已正式取消。今後，有關列車上唔再推出有關女賓包廂服務，但如果女乘客日後有呢方面嘅需要，當局可以盡量安排。聽講，鐵道部原本好心，為女士們着想，試行推出有關服務，點知女士們唔領情，計劃乏人問津，最終推出短短半個月唔到就壽終正寢。