數碼影音：首配即睇屏幕高低角度影得梳乎

唔講可能好多攝影專家都無留意，原來現時數碼單鏡相機（DSLR），個芒只可睇相而唔可以睇住影，DSLR天生就係要用ViewFinder影相，不過呢個慣性將會被OLYMPUS改寫，推出全球首部可以用芒嚟睇住影相嘅E-330，加埋個可調校角度嘅靚芒，想歎住影相都無問題！記者：許福合
攝影：譚盈傑
ImageGirl：Yuki

猶記得幾年前，筆者第一次拎起DSLR，其實都想過「點解個芒無畫面？」，DSLR上嘅LCD只係用作重播相片同一般設定之用，實用性反而唔及一般DC仔，E-330可以話打破單鏡DC嘅宿命，令屏幕都可即時預覽，加埋可上下調校，度相攞構圖舒服得多！

行貨售價$8,680（連標準鏡）

■顯示屏可拉出，作上下調校角度，影相更方便。

另有CCD即時取景

E-330用上個新設計，取名LiveView，聽個名就知可即時預覽嘅意思，配合輕巧機身，即使舉高舉低都唔怕吃力。其實秘密在於使用上一個專為取景而用嘅小型CCD，比真正影相用CCD慳電，加上分光鏡就可作兩面之用。不過據網上玩家指用上分光鏡會令到ViewFinder內光度減弱，筆者實際試用時發覺問題不大，光度無明顯變暗。另外新設計亦提供咗一個新玩法，除正常拍攝預覽外，還可將拍攝範圍中間點放大10倍，方便手動拍攝對焦之用，能夠非常精確知道夠唔夠Sharp！之前有人估計E-330會使用EVF（電子觀景窗），幸好試過實物後發覺仍然採用光學式設計，起碼清楚過EVF啦。

■因為可以睇住芒影，所以尺寸都用上2.5吋規格。

■與一般DSLR不同，反射鏡是打側放置。

■E-330採用最少4片反光鏡，設計相當複雜。

2.5吋芒上下揭

E-330為咗配合「睇得」嘅芒，2.5"顯示屏可上下調校角度，用家即使高舉或「低炒」拍攝，都仍然可確保見到畫面，要拍攝唔同角度都方便得多。新機更用上全新開發750萬像素LiveMOS感光元件，保留OLYMPUS4/3系統，LiveMOS特別強調省電同低雜訊，而相片質素據講就差唔多。而實際試用時，發現E-330係一部相當易用專業機，尤其機身按鍵明顯花過心思，相當順手，連環快拍功能更可比得上自家E-500，可連拍15張JPG或4張RAW，其餘功能包括有49區測光、支援xD/CF雙插卡、景深預覽、ISO高至1600等，筆者唯一覺得不足係對焦點只有3點，以DSLR標準來講，就比較少。