關淑怡繼日本天后中島美嘉同韓國小天后BoA之後，成為亞洲首位華人女歌手推出演唱會UMD（可以喺手提PSP遊戲機上播放）。據知今次關淑怡嘅酬金相當之高，所以噚日佢特登着咗件低胸衫去到尖沙嘴出席記者會，重好罕有咁準時嚟到，不過佢話只得十分鐘接受訪問。
關淑怡下個星期舉行嘅個唱賣飛唔係咁理想，事件經報道後，噚日關淑怡接受訪問時先發制人話：「我非常榮幸PSP對我音樂及演唱會嘅支持，我同我成隊team會身體力行咁多謝番買我啲飛嘅觀眾，希望到時大家會enjoy啦。」
唔計較酬勞
當記者見關淑怡宣傳完個唱後，想問番佢今次活動嘅酬勞係唔係好吸引時，關淑怡未聽完就激動大叫：「唔好再打擊我！」搞到在場傳媒嚇咗一跳，後來佢先回復平靜話唔會計較酬勞，重講錯話𠵱家正密鑼「滾」鼓準備演唱會呢！
