富貴黨議員楊孝華噚日喺立法會提出一條書面問題，指私人屋苑泳池射燈擾民，康文署過去兩年只係接獲三宗同類投訴，要楊孝華費神過問，原來內裏大有文章。楊稱事緣早前接獲淺水灣道豪宅花園大廈一外籍住客投訴，指新落成嘅GrosvenorPlace個泳池射燈「燦」眼，要求楊孝華介入。
楊孝華身兼南區區議員，佢強調該外籍人士只係選區內市民，幫佢出頭只係盡議員責任為民請命，能唔能夠解決問題都唔知。當局回覆話會接觸呢個泳池嘅管理人員，喺唔影響安全情況下調整射燈角度或加遮光罩，若果夜晚無人游水，可能畀個泳池唔開燈㖭。
觸發呢個豪宅住客投訴個案嘅GrosvenorPlace，發展商係泛海集團，個樓盤曾當選多個國際大獎，引來投訴相信始料不及。
傳真︰2623-9278
電郵︰[email protected]