大市牛皮，主力炒個別股份，安德利果汁（8259）可留意。
過去1個月，安德利表現強勁，由0.50元升上0.82元，成交亦大幅增加，近日調整，形成旗形，噚日又見有番勢，升破0.80元阻力，量度上升目標係1.10元。
安德利咁強，其中一個理由，係有大財團入股，日本三井物產株式會社已購入安德利5.06%權益，令大財團同基金持有的權益上升到逾30%。其他策略性投資者有統一集團（4.99%）、DeutscheBankAkt.（8.11%）、AtlantisInv.（7.16%）同景順香港（5.09%）。聽聞好多基金拍緊門，一單大deal好快會落實。
三井原本已持有集團旗下煙台龍口安德利果汁10%股權，並合作拓展濃縮蘋果汁於日本的銷售渠道，今次進一步成為策略性股東，定會與集團在業務上有更密切的合作關係。三井為世界500強企業之一，經營有色金屬、汽車、能源、船舶同紡織等多元化業務。
產能擴大盈利增
第二個理由，係今年的蘋果供應將可回復正常，安德利將可繼續其產能擴展大計。集團生產濃縮蘋果汁，未來增長來自年產能力擴張、生產果膠，以及拓展歐洲日本和東南亞市場。集團將投資1億元人民幣，在大連擴建一條3萬噸產能的生產線，預計可於今年第3季投產；另外，會透過收購增加4萬噸產能，令年產能由現時的18萬噸上升至25萬噸。
05年度（12月年結），估計安德利獲利約1億元，每股加權盈利6仙，PE約13倍，今年產能上升，而拓展零售方面會有盈利貢獻，預測PE將會降至單位數。
集團佔有40%權益，與外資合營生產果膠，引進兩條生產線，計劃在06年中及07年建成投產，年產標準果膠達6000噸。生產天然果膠需要大量果渣，約40噸濕渣才可製成1噸果膠，行業門檻極高，但濕渣係製成濃縮果汁過程中的廢料，原料成本等於零，利潤非常可觀。
安德利係少數在創業板掛牌的基金股，公司已安排轉主板（估計上半年可成事），基金會更安心持有，甚或加碼。
郭兆誠