由國務院批准組建、有渣打集團入股的天津渤海銀行，千呼萬喚，今日在天津正式開幕。咁大件事，雙方高層當然盡出，新任渣打亞洲區副主席陳德霖一早已飛咗上去，聯同集團另一執行董事布樂克及中國區總裁、特首胞妹曾璟璇，一齊出席儀式。
渤銀方面，董事長羊子林及行長馬騰親臨主持大局。渤銀鐵定本周六搞成立慶典文藝晚會，屆時渣打集團主席桑德森、渣打香港主席兼地鐵行政總裁周松崗，及渣打香港總裁蘇利民，都會齊齊亮相。
既然咁多渣打高層雲集中國，當然食得唔好嘥，後日適逢係佢哋喺北京嘅支行開幕，陳德霖、集團執行董事南凱英同埋曾小姐，又會馬不停蹄咁飛去北京做大騷；唔怪得有人話狗年驛馬星動。