昨日立法會議員黃宜弘同公眾講︰「震驚、強烈不滿及不可接受，加起來就比譴責更嚴重。」聽完消委會講銀行利息加快減慢嘅問題之後，利世民決定公開譴責消委會。
首先係「震驚」。消委會話香港嘅銀行最優惠利率無跟隨美國利率走勢！利世民可以話畀各位讀者知，如果要香港銀行跟足美息係絕對可以做得到，方法就係將港幣完全美元化！唔知道消委會幾時取代咗金管局，不過特區政府呢個新行政安排的確令人震驚！
跟住係「強烈不滿」。消委會既然認為銀行加快減慢，就唔該佢同時譴責金管局辦事不力。點解？因為係香港貨幣制度有漏洞，令到資金成本經常同美元息口步伐唔一致，銀行同業拆息唔能夠跟隨美國息口，最優惠利率咪同美元息口唔一樣囉。所以消委會唔將矛頭直指金管局，就係唔管麻鷹管雞仔，呢樣嘢真係令人強烈不滿。
消委會今次份報告亦都「不可接受」，原因係佢將短期存款利率走勢同按揭最優惠利率走勢相提並論。消委會主席陳家強教授都係財務學者，點解佢哋連「長息短息走勢唔一定同步」呢個咁簡單嘅常識都唔知，重夠膽死走出嚟開記者會？
教壞學生
如果有人自認經濟文盲虛心請教陳教授，佢一定講︰「嗱，正常經濟環境呢，愈長期嘅息率就愈高，而長短期息率嘅差別就要睇經濟環境。你哋要比較走勢，就一定要考慮呢啲因素，唔可以就咁攞存款利率同按揭利率比較，知唔知啊？」
利世民知道保護消費者權益呢個任務好偉大，但係消委會嘅大佬，請你唔好以為自己好偉大，就可以將完全憑空想像嘅嘢當事實，咁做會令到全香港所有教經濟同財務學嘅老師教授好難做，如果有一日上堂教貨幣同利率時，學生攞住你哋份報告話︰「老師，消委會話長短息嘅走勢應該一樣㗎喎！」點答？
要推翻你哋講嘅嘢，就等於要我哋削弱你哋保護消費者權益嘅形象；但如果任由呢啲錯誤嘅經濟理論延續落去，我擔心香港唔使十年八年就行共產主義，呢個結局的確不可接受。
所以綜合「震驚」、「強烈不滿」同「不可接受」，利世民決定以「立法會議員黃宜弘邏輯」，宣布公開譴責消委會。
利世民