雖然煲呔嘅特首任期到明年六月先夠鐘，但係各路人馬已經磨刀抹劍，準備上馬挑戰曾蔭權，等佢唔好一個人自己跑以為贏梗。
所謂攻心為上，首先傳佢後台廖暉不穩，等佢陣腳大亂；然後連民建聯都話會搵一百個提名，推個人出嚟參選玩吓，咁嘅局面，都唔好話冇料到。八方聽聞，煲呔背後嘅KingMaker李國寶曾經同人講，佢估至少有四個人會參加第三屆特首選舉，同煲呔決一死戰，言下之意，係叫煲呔唔好太老定，要全力以赴。
中央唔敢撐煲呔
究竟邊四個咁猛料呢？八方姑且喺度猜一猜。第一個肯定係煲呔自己，佢恨連任恨到流口水；權力呢樣嘢，一旦得到好難捨得雙手送畀人，所以實會施展渾身解數，全力討好中央以及港人，希望可以繼續有得玩，同曾太再喺禮賓府住多五年。
本來煲呔機會好高，可惜一單政改露底，北京發覺佢都搞唔掂班民主派，真係有啲所託非人之感。聽講，胡溫更以今次人大政協會議要全心全意搞建設社會主義新農村為藉口，喺兩會期間不接見嚟列席嘅煲呔，費事俾人誤會佢哋挺曾。如果傳聞屬實，煲呔都幾弊。
既然煲呔未必係真命天子，咁陳太就不妨代表泛民出嚟挑戰呢位舊同袍兼舊下屬。煲呔能，陳太怎會不能？只會更勝一籌。當然陳太都要睇睇北京吹乜風先至最後決定是否參賽。總之留番個位畀民主派代表一定冇錯。
而照民建聯主席馬力早前嘅講法，為咗安全起見，左派都會推個人出嚟做大後備，萬一煲呔又滑鐵盧，佢哋都有人可以接手，至於你問左派有冇人才，的確真係冇乜，所以到時曾校長要頂硬上，因為佢老哥係港大高材生，口才好，英文又得，出國訪問都唔會失禮人。
最後一個唔漏得嘅人選梗係唐唐，唐老太一直都認為佢個仔係特首人選，上海幫雖然失勢，但係唐唐腳頭好，應該加分，間中講錯嘢相信大家都會原諒佢係冇心之失，做慣老闆冇法啦。
嗱，八方好快就幫寶哥哥提咗四個特首候選人嘅大名，所謂姜太公釣魚，有人提醒八方唔好漏咗寶哥哥自己，佢都夠晒班參賽。至於田少，雖然有孫萬事足，但係佢始終睇煲呔唔過眼，唔知會否最後自己披甲上陣呢。
傳真︰2623-9278
電郵︰[email protected]