華華喺酒會上又見到飛天豬朱幼麟，佢同老婆何妙馨（圖右）拍拖到場，鬼咁恩愛，問佢兩公婆點過情人節？朱太一聽就大呻，話結婚咁耐，朱幼麟只係送過一次花咁大把！前日情人節雖然有一齊食飯，但禮就梗係冇啦！
唔好以為朱幼麟真係咁唔識做，原來佢唔興送禮，但就最鍾意同老婆一齊去旅行四圍玩，兩個人趁住春節假期上咗北京，住喺佢哋間四合院，元宵嗰晚重去咗廟會，咁都唔止，家吓已經計劃緊復活節去歐洲度假，真係羨慕死人！
另一個係酒會見到嘅幸福女人，就係蔣震個四女麗莉（左），佢好開心咁同華華講，情人節親自下廚，整咗幾味畀老公同仔女食，重特登整咗個蛋糕送畀老公，咁啱佢老公又買咗個蛋糕送畀佢，兩個都算心有靈犀啦！
程志遠攝