新年春茗飯局撞期撞到七彩，好似噚日香港證券學會開Party，又撞正外交部駐港專員楊文昌嘅Farewell飯局，一早到場嘅范鴻齡、曾鈺成、蔣麗莉、詹培忠等，都係走兩場嘅貴客，難怪滾水淥腳；至於捧場撐到底嘅，就有證監主席韋奕禮、港交所周文耀、朱幼麟夫婦，同埋做主禮嘉賓嘅財經事務局何鑄明，真係好唔話得。
撞期固然唔好，港交所董事會重要送多份大禮（進一步收窄細價股買賣差價）來「贈興」，令到在場班經紀都有唔少怨言！學會會長張華峰話，新措施實行就一定㗎啦，證券行成本會上升，牌價拆多咗，咁落盤出錯機會又大咗，但呢啲都可以用時間去適應，最唔開心係冇人聽佢哋支笛啫！
華華見到有得喺立法會代表金融界出聲嘅詹培忠，佢笑笑口話自己年紀大，啲「怒火」無乜得剩，但仍然會繼續幫業界爭取應有利益，所以大家時不時仍會見到佢同任總互片。話就係咁講，但佢私底下又同華華講，話同任總其實幾老友，周不時都約埋食吓飯，好似今個月24號晚，又同任總有飯局喇！
李華華
讀者如有任何意見或報料，歡迎發送電郵至[email protected]。