蘇格蘭樂隊新貴FranzFerdinand（名字取自引爆第一次世界大戰的奧地利皇太子）前晚首度來港開Show，與香港樂迷初次見面便相約在情人節，都幾識冧Fans！當晚入場共二千多個Fans，當中一眾穿上樂隊橫間Tee嘅Fans特別搶眼，離場時個個都笑笑口，看來都對FranzFerdinand（F.F.）這晚的演出十分滿意。當然啦，情人節有全球Hit爆的F.F.四子陪你過喎，重唔開心到跳起？
記者：謝翠玲
攝影：周旭文
協力：黃若茵
瞓身演出驚喜多
廿五歲以上，大概都對當年Suede在伊館的演出奉為經典。對於二十以下的新生代，這個經典的接棒者大概輪到F.F.了。儘管票價不算便宜，最平都要$480，但仍無損F.F.的吸引力，當然啦，F.F.咁當時得令，來港演出已難能可貴，貴少少都抵！
繼續一貫整齊乾淨造型的FranzFerdinand四子甫出場，二話不說便以音樂打招呼，本來坐着等開場的樂迷都企晒起身又嗌又唱又跳，氣氛即時燃燒。穿着至愛紅衣的Alex，非常懂得帶動現場氣氛，突然瞓地彈結他，又或者跟另一結他手Nick跳着他們的獨特「踢腳舞」，動作多多，令演出氣氛持續高漲。
全晚高潮是唱成名曲《TakeMeOut》。當結他前奏響起，便聽到Fans大嗌「TakeMeOut！」，就連一直專注做筆記的記者也忍不住站起身一齊跳！曾揚言要做一支「令女孩子聞歌起舞」的樂隊，F.F.的願望在香港又實現多一次。
樂評人DJ大讚 演出夠Fresh
經常看慣大小外國音樂演出的專業樂評人和DJ，對F.F.在香港的首次演出都很滿意，跟住全場一齊又跳又唱夠晒盡興而返！
叱咤903DJMini
「我覺得今晚個Show近乎Perfect！F.F.的演出感覺好新鮮。我最鍾意唱《TakeMeOut》那Part，氣氛好好，臨尾一齊打鼓那段都好驚喜！」
樂評人袁智聰
「成個Show氣氛幾好，唱《TakeMeOut》那段最正。近年都好少有咁Groovy、咁有Energy的新Band來港演出，所以感覺幾好，幾醒神！我畀80分。」
樂評人黃志淙
「我覺得今晚個Show好聰明，頭、中、尾三段都有Fans熟悉的『飲歌』穿插，高潮位分布得好平均，樂迷很易投入。主音Alex的Showmanship非常出色，好識搞氣氛，呢場是高水準的演出！我畀80分。」
演唱會紀念品大晒冷
外國樂隊不會年年來港，想留下美好回憶，當然要選定件紀念品帶回家。F.F.演唱會紀念品計有紀念Tee、手帶和鎖匙扣，由$40至$200不等，價錢唔算好「掠水」。
Fans：完全無悶場
完場出來，當然要第一時間捉住Fans評分。結果Fans一致好評，重着晒跟演唱會海報主題相近的橫間條Tee來捧場，認真識做。
