香港社會服務聯會日前舉行第四屆「商界展關懷」嘉許典禮，表揚工商同埋公共機構員工熱心參與公益事務，關懷社會上貧苦大眾，今年有九百六十三間機構得到「商界展關懷」嘅Ｑ嘜。
噚日大使都有出席嘉許禮，《蘋果日報》已係連續第四年成為其中一分子，喺場內大使見到唔少社福界嘅老友記，大家都打個招呼，講講新一年有乜大計。
大使見到有份提名《蘋果日報》攞「商界展關懷」Ｑ嘜嘅長者安居服務協會總幹事馬錦華，佢同大使講，蘋果基金一直係安居會一個非常友好嘅合作夥伴，過去九年安居會同蘋果基金攜手合作「平安鐘專戶」，為超過一千四百幾位無依長者免費安裝平安鐘，解決生活急需。
致力扶助弱勢社群
大使數一數手指，眨吓眼蘋果基金成立已有十個年頭，基金一直致力扶助弱勢社群，舊年蘋果基金撥咗三百七十五萬多元資助一百三十三個社福機構推行社會服務計劃，另外撥咗二百二十三萬多元助學金，減輕六百一十五位中小學生嘅教育開支，大使喺度代表所有受惠人講聲多謝，並祝福各位善長喺狗年財運亨通，繼續支持蘋果基金。
蘋果投訴熱線：29290000
社會服務熱線：29908288
傳真：23702192
電郵：[email protected]