喺機場隔籬個亞洲博覽館開咗之後，搶咗唔少國際展覽會嘅客，除咗華華之前講過嘅GlobalSource（上海）之外，瑞士國際電訊展，同埋喺新加坡搞咗13屆（每兩年一次）嘅亞洲航空展，噚日都落實咗喺07年9月，移師到香港開Show！同以前嘅展會有啲唔同，展期只得四日，純貿易性質，唔會有飛行表演，亦都唔會招待公眾！
據華華所知，04年個航空展，為新加坡帶來超過20億港元經濟收入，展會生意額超過270億元，傾成咁大單生意，唔怪之得亞洲博覽館高層盡出，重要開埋記招威番吓！
博覽館副行政總裁哈永安（圖）話，兩年幾之前已經主動搵ReedExhibitions傾合作，當時競爭對手好多，個個都有番咁上下實力，到舊年10月先知道得咗，爭得贏主要係商機多過人！咁又係！毗鄰中國內地呢一點，就已經加唔少分啦！