正月未過，春茗陸續有來，恒豐金林世榮就揀咗喺情人節同傳媒開Party！雖則過咗十五，但林世榮都利是照派，封封五百，華華代佢捐咗畀蘋果基金，並代表有需要嘅市民講聲多謝。
咁啱得咁蹺，噚日到場嘅記者清一色係女士，全場只得林老闆一個男丁，飯後影大合照之時（圖），佢重好風騷咁話，一定要將張相放到大一大，掛喺佢個辦公室度，等其他人羨慕吓咁話！問林世榮情人節對太太有乜表示，佢即時笑笑口話，踏正零時已經送咗花。
林世榮話每逢過年都會外遊，嚟咗香港三十幾年，今年先至第一次喺香港過年，真係講都冇人信！過年做啲乜？咪拜吓年、飲吓茶、拉吓二胡同入吓馬場咁啦。
佢話本身唔鍾意亦唔識賭馬，係咁亂篤，結果都中咗六場馬，刨馬經者聽到真係激死！