之前提過，電盈前副主席張永霖去科大演說要講條件，結果要延至10月先成事；佢對大學生要求高啫，但對啲小學生就寬容好多；好似早排佢同前財爺梁錦松，一齊應《亞視兒童台》之請，同15個英華小學學生真情對話。
張永霖除咗同小朋友分享讀書心得之外，又話自己有今日嘅成就，全靠當年狂睇課外書，之後重即場推介咗本《朱自清全集》畀啲小朋友。至於身為英華舊生嘅阿松，就話自己細個好窮，曾經要喺學校飯堂廚房度瞓，英文又唔好，唔夠分升中六，幾經辛苦先至苦學成才，實行用自己嘅經歷勉勵班師弟師妹！
阿松同張永霖一齊幫「小母牛」做義工，一個係主席，一個係董事。大家想睇吓佢兩個點同啲小朋友真情對話，今日下畫四點留意《亞視本港台》，星期六同樣時段重播。