一張餐牌n咁多味，都可能無樣啱你心意？呢間元朗新舖一定啱你口胃，因為正如舖頭名「許願樹」一樣，只要你講得出，大廚就會為你做到心水菜，這裏主攻創意爆燈私房菜，魚蝦蟹瓣瓣有，重要無限驚喜，嗌乜有乜，強調：「只要你講得出，就會整畀你食！」咁堅？師傅，我想食叉燒蘋果沙律喎，得唔得先!?
記者：盧家蕙
攝影：陳盛臣
Model：Jode&Ric@Salvador
食客睇見嘩嘩聲
唔係天方夜譚，叉燒蘋果沙律確係10多年前曾師傅於酒店自創的菜式之一，注意係10年前，嗰陣未有Fusion菜，人人聽到反應都係擘大口得個窿，無不折服其源源不絕嘅創意。只要品嘗過曾師傅一手炮製出嘅精緻華麗菜式，就知佢堅定流，師傅話：「我入行30幾年，我覺得廚師除咗要識煮外，重要有諗頭，即係當我捧碟菜出嚟，個個都嘩嘩聲，咁先係掂！」
許願樹創意美食拼盤 $198
連拼盤都創意過人，有中式蠔皇扣鮑扒、西式、日式石燒極品牛柳及意汁焗大蝦，好有Fusion感覺，鮑扒矜貴、牛柳軟腍、蝦肉爽口，大堆頭之作！不過真係好過食薯皮、雞翼或洋葱圈呢類千篇一律拼盤喎！
黃金玉米鮮百合炒海浪魚 $148
曾師傅話：「呢道菜係由蛋黃黃金蝦演變而來，不過少了油膩感，揀魚係因為唔似蝦要剝殼嘛！」魚肉鮮甜而香口，食落口唔會成擔油，玉米同百合等配菜也頗搶口，跟魚肉味道很夾。
麵包黑椒蟹 $188
破包而出的肉蟹屬師傅得意之作，大大嚿麵包包裹着蟹身，甫切開即聞到濃烈黑椒味，啖啖蟹肉香辣惹味，索晒醬汁及蟹香的麵包亦不容忽視，記住食埋先好走人。
蜜汁烤雞 $78
小記失驚無神口痕想食雞翼，估唔到師傅唔使5分鐘，就隊咗隻靚靚雞翼畀我；水準拍得住BBQ嗰陣嘅燒雞翼，當然更加大隻同入味啦！
自創SurpriseMenu
曾師傅喺93年攞過Hofex國際美食大賽金獎後去過成都、夏威夷、東南亞、重慶等地學藝，又到過珀麗酒店為客人做SurpriseMenu，師傅坦言：「若果聽到太怪誕或者明知整出嚟多數唔好食，我都會畀意見個客嘅。」呢啲咪叫做以客為本囉！
a)唐人街烤鴨釀墨西哥薄餅$98
係師傅於外地學來的菜式，佢話：「夏威夷嘅華人無燒鴨食，於是自創咗呢種唔太正宗嘅燒汁烤鴨，改良口味同食法後大受歡迎。」釀入墨西哥薄餅的食法有點像填鴨，嫩香鴨肉及配菜多到迫爆，口感豐富，滋味非常。
b)秘製神風羊膝$98
師傅於重慶打工時特意創出的神風羊膝，工序頗繁複，要經過燒、燜、炒等過程，再配合重慶的辣椒、花椒，羶香羊肉夾雜既麻且辣的味道，小記最享受它為味蕾帶來的片刻刺激，感覺非常過癮。
c)豆奶津白$68
津白食唔少，次次都係上湯加雲腿，嫌悶？試吓呢個滑溜溜的豆奶津白，包你食過翻尋味，豆香濃郁，同津白出奇地夾，舀一小碗豆奶邊食邊喝，感覺新鮮又有益。
d)奶油焗湯圓伴雪糕$48
以香滑奶油焗花生湯圓，入口香而不滯，熱騰騰的湯圓伴上冷冰冰的雪糕，充滿冰火的冷熱口感，令人回味，不過應該都幾肥，女士們又要掙扎一番。
e)牛油梨凍湯$36
有古講，此湯屬於70年代，有次有個台灣客指明要飲，師傅就即時整畀佢，味道當然頂呱呱，個客重不知幾感動㖭！質地似醬汁多過湯，幼滑香濃的牛油梨味於口中久久不散，不妨一試。
食客有Say
許願樹（24421811）
地址：元朗教育路87-99號鴻發樓地下E舖
營業時間：7:00am-11:00pm
歡迎任何私房菜建議，惟需早一日預定。
