慈幼會噚晚喺會展舉行來華百周年紀念活動，場面真係星光熠熠，除咗近期盛傳會被教廷委任為紅衣主教嘅陳日君之外，就連曾經喺慈幼會學校讀書嘅煲呔都有出席，其他貴賓仲有專程喺意大利嚟、慈幼會總會長查偉思、五位嚟自越南、菲律賓同日本嘅主教，仲有香港教區輔理主教湯漢同副主教陳志明，都有出席，可算係天主教界一大盛事。
傳又一韓農將獲撤控
陳主教噚日被問到係咪會「升職」，都係嗰句，話冇嘢講，一切係傳媒揣測，最後就補番句，睇吓梵蒂岡係咪真係有公布先再講啦，「就算係真，羅馬嘅規矩都係唔講得㗎啦！」
識咗陳主教好多年嘅查偉思就話陳日君個人好開放，講嘢唔係為咗個人利益，而係為所有人好，佢仲好開心咁話，陳日君係好強嘅樞機候選人，非常為人熟悉，如果陳日君被委任，就係佢哋個會第八個樞機，到時佢一定會出席個典禮賀喜吓。
雖然𠵱家唔可以百分百肯定，但從陳主教蓮子蓉咁嘅面口，就應該知佢心情極靚。有人爆料話，陳主教咁開心，唔係因為佢會更上一層樓，反而係因為韓農事件，因為𠵱家三名等住後日審嘅韓農中，據聞至少有一個會被警方撤控。陳主教一直為佢哋奔波，如果佢哋真係冇事，主教又點會唔高興。
除咗陳主教，煲呔噚日心情都應該不俗，兩公婆先喺民政酒會滿場飛，然後又再參加慈幼會個活動，煲呔臨走前，重錫咗陳日君隻權戒一吓。
煲呔夫婦新居撐枱腳
煲呔同太太噚日冇時間出街食飯，只係喺禮賓府享受二人世界，老夫老妻，玩吓煮飯仔都好有情趣。煲呔呢個情人節，就係同太太孖公仔去酒會咁過咗。咁又係，對住老婆，點都好過前日咁，要兜口兜面對住啲示威者咁尷尬，難怪煲呔咁高興。
仲有，煲呔真係要多謝新聞處，事關噚日會展守衞森嚴，當正記者係賊，個記者欄擺到冇雷公咁遠，加上直至所有官員走晒，記者先可以走出欄外唞吓氣，想望清煲呔個樣都好難，更何況埋身？新聞處話會檢討吓個安排，希望佢哋真係守信用，唔好拖得一次就一次。
當然，情人節唔等於唔使做，噚日煲呔如常主持行會，但傾啲咩，真係冇人知，據聞好齊人，因為個個休假完返晒嚟香港。另外，根據港大民意網站喺月初進行嘅調查顯示，最受歡迎嘅頭五名非官守行會成員，依次係周梁、寶哥哥、棠哥、曾鈺成同振英哥，但阿曾同振英哥得分，都重低過五十分嘅水平，睇嚟真係仲要多多努力。
爆料熱線：29290000、27860099
報料傳真：26239278
報料電郵：[email protected]