噚日係甜蜜情人節，今日又係乜日子？其實唔係乜嘢大日子，但8號仔嘅長期小股東，今日肯定唔甜蜜。
話說千禧年2月，李澤楷嘅神話股1186盈科數碼動力同新加坡電訊爭奪8號仔。當時重叫做香港電訊嘅8號仔，炒科網熱潮兼炒購併，日日創新高，股民如癡如醉。六年前嘅今日，股價最高上到28.5元，收市都有26.35元；當時重未五合一，計入03年1月7號五合一因素，當日收市價係131.75元。
之不過呢一日之後，價位就一直係咁沉，儘管2月29號，盈動成功併購香港電訊，但幾年下來，愈跌愈殘，股東6千億元嘅財富煙消雲散，好多人嘅退休金化為烏有。當日高價同家吓嘅五皮三相比，足足跌咗九成六，真係諗起都心傷。
華華記得有個朋友，當時啱啱賣咗層樓，將手頭上所有錢買晒8號仔，佢話個個唔信都信李澤楷啦，後來點？都唔好提囉。近年電盈終於有小小起色，固網客止跌，又做番流動電話，重先後引入網通同新橋做股東，睇嚟小小超已大功告成就快可以甩身，但高位買入8號仔嘅小股民，就有排都未望到岸！
李華華