科網潮期間，唔少想發「得金」（.com）財嘅老中青年都好希望有朝一日可以得到創業基金睇中，投資三五千萬美金然後去納斯達克上市去也。結果一個大浪打埋嚟，納斯達克之夢粉碎，大家又返嚟呢個有地心吸力嘅凡塵，繼續食人間煙火。
科網泡沫爆咗，但係科網企業其實𠵱家先至係真正成熟，大浪過後重可以繼續玩落去嗰啲先係真英雄！雖然話科網泡沫爆破蒸發咗好多紙上富貴，但既然係冤枉嚟，其實瘟疫去都唔會造成好大傷亡，當交學費囉。
既然交咗學費，唔學番啲嘢就笨。科網潮畀咗世人最大嘅教訓，就係生意唔可以完全脫離現實；但係另一方面做生意又一定要有遠見，唔可以墨守成規。其實好多傳統企業喺呢個科網潮俾人淘汰咗，亦都有唔少行業經歷咗翻天覆地嘅改革，不過大家嘅眼光集中喺「得金」，冇留意到其實個世界一早已經唔同晒。
EOIP
EOIP就係EverythingonInternetProtocol，意思就係「所有嘢都上網」。如果係電訊業，就唔再有本地電話同長途電話，電話就係電話，一個號碼打通全世界，呢個概念就係網上電話Skype喇！如果唔係世界各地政府嘅抗拒，網上電話應該已經完全打殘傳統電訊業。
再以利世民比較有興趣嘅傳媒娛樂業為例。最大嘅改變就係資訊同資訊渠道分家。簡單啲講，就係呢個世界唔再係以報紙雜誌對電台電視，亦唔再係平面對電子做區分。跑新聞拍劇集嘅公司，就專心做好內容；另一方面，擁有資訊渠道嘅好似電視台電台報社雜誌社，就專心做好多渠道發展。其實呢個發展好大原因係EOIP嘅影響，因為資訊喺互聯網可以有好多形式出現，如果冇更細嘅分工，係冇可能發展落去。
唔明？睇吓你可以喺幾多個渠道睇到利世民呢篇文章？雖然利世民唔識得點樣去將呢篇文發放全世界，但係我知道如果專心寫好篇文，等人幫我將篇文印落報紙，放喺互聯網流傳，甚至做個Blog，或者整個Podcast……
如果所有嘢都要我自己做晒，又點可能成事呢？
利世民