噚日係情人節，亦係記者程翔被內地拘留嘅第二百九十九日，程太劉敏儀喺電台講到，程翔以前就對情人節、母親節同父親節好反感，覺得呢啲節日太商業化，但近年程翔都改變咗諗法，覺得呢啲節日都幾好，可以趁機同屋企人團聚。原來劉敏儀呢十年嘅情人節都同丈夫一齊晚餐，今年就兩地相思，只有希望老公早日歸來啦！
程太同八方講，會繼續喺香港撐老公，但希望程翔千祈唔好認罪，因為佢冇做間諜，冇理由要認罪。一直出手義助程翔嘅飛哥話，聽到有消息，程翔案到𠵱家戟住咗，正正因為程翔唔肯簽悔過書，為咗搜集罪證，啲檢察機關就係咁拖時間囉！特區政府就話，已經同中央反映家屬要求同申訴，有最新消息一定會通報家屬喎。
爆料熱線：29290000、27860099
報料傳真：26239278
報料電郵：[email protected]