特首選舉暗中開跑，煲呔睇嚟要加倍努力，噚日工聯會三子，嫻姐、鄺大狀同王國興都開到口，話明除非煲呔唔要勞工界嗰四十張選票，否則就一定要做最低工資，講到好實牙實齒，唔似靠嚇喎。梗係啦，煲呔上年選舉時話過，勞顧會今年六月要就呢樣嘢有共識，據聞勞顧會支持同反對勢均力敵，六對六，坐喺入面嘅經濟發展及勞工局常秘張建宗，最終要投神聖一票。
張建宗點投，當然睇煲呔意向。如果煲呔唔兌現承諾，又話擺去策發會傾，怕且都要做足心理準備勞工界同佢反枱，仲會集體杯葛會議。
工聯會三子喺立法會愈戰愈勇，梗係要整番個黨先啱身份。點知佢哋三個原來已經有晒分工，資歷最深嘅嫻姐做黨魁，講嘢都幾辣嘅鄺大狀就做黨鞭，書法一流嘅王國興做秘書長。鄺大狀話，自己夠膽鞭嫻姐㗎，咁佢又幾時鞭策吓自己，做好地區工作，踏出直選第一步呢？
爆料熱線：29290000、27860099
報料傳真：26239278
報料電郵：[email protected]