我阿利幾廿歲人，閒來無事，都會出香港同啲老友飲吓茶，吹吓水。到咗咁上下年紀，呢啲聚會就變咗數人頭大會，睇吓邊個邊個唔響度。託大家嘅福，最近食飯都算人齊，冇話邊個要行先一步，證明香港人越來越長命。
長命有好有唔好，好就係可以多啲時間睇住個孫大。唔好就係要搵多啲糧草先可以退休唔撈。如果五十五歲唔撈，八十歲命，有廿五年要慢慢搣，咪話唔嘢少。所以我啲老嘢行家，自己開檔嗰啲，做到五十六、七都未捨得收檔，要挖多啲老本是也。
盈保計錯數 老嘢一頭霧水
呢日食飯，就講開盈保計錯數單嘢。講真，我阿利退休咁耐，呢啲新例我鬼識，報紙又講啲唔講啲，睇到我一頭霧水，所以我趁機都問吓班老嘢，究竟係乜嘢一回事。
誰不知一開口，阿白頭陳就一句撻埋嚟：「超，鬼知佢乜頭乜路。嗰條新例，我都未睇過，都未知佢噏乜。」
我擘大口，拗晒頭：「唔係嘛，你唔識？話晒你仲做緊呢行，啲新嘢冇理由未睇過！咪咁孤寒，過兩招嚟唔使死嘅。」
「阿利，你唔係唔知我做啲乜嘢客。我嗰啲廠仔貿易公司仔，邊度使用啲咁高深嘅嘢。盤數年年差唔多，真係咪埋眼都簽得。如果唔係驚公會查，連『快勞』都費事做，做完份account都出得。你問我呢啲咁鬼嘢，唔識都好正常啫。你咁好學，咪打去你間舊舖，問啲鬼佬囉！」
新正頭，俾個老嘢窒頭窒勢，今晚跑馬輸梗。