港股噚日先跌後升，一個拗腰，幾乎收復前日失地。恒指收15420，升108點；期指重勁，收15432，大升182點。至於國企，直情係犀飛利，H股指數收6451，飆升137點，升幅2.12%，H指由噚日低位6213反彈上高收，升咗239點；H指期貨由低位6210彈上6472最高收，足足升咗262點。
本來，經過前日一跌後，成個市已經淡淡哋，但噚日出乎意料地來一個單日轉向，短期市勢又有番轉機。先睇H指，勁彈上6451收，同本月7號的收市6471，只相差20點，一升破，調整就可確認完成，又升過。至於恒指，要睇多一兩日，若能重上15500，調整亦係完成。
家吓個市，炒個別股份為主，好似隻中民燃氣（681），升完可以再升，噚日搶上0.76元收，再升11仙，升幅16.9%。中民咁升法，係有染「彩」嘅概念，但其燃氣本業一樣好掂。
提價空間大盈利有保障
另一隻「細細粒」嘅鄭州燃氣（8099），噚日亦有拗腰嘅美態，由低位0.77元搶上0.84元收市，升4仙，成個倒轉錘頭、單日轉向嘅格局。
上月中，鄭燃升破0.80元嘅徘徊區阻力後，本月初上到0.92元，先出現調整，家吓後抽完成，下一個上升目標係1.05元。
鄭燃主要業務係在鄭州向住宅、商業、工業用戶及汽車銷售天然氣，且係獨家，所以盈利可以話保證咗，年年都有穩定嘅增長。05年度（12月年結），首3季已獲利逾7000萬元，估計全年盈利超過1億元，每股盈利8.3仙，以同類股PE約15倍計，鄭燃股價起碼可見1.25元，即係有近50%的上升空間。
講到同類股，由05年起計，中國燃氣（384）升咗64%，新奧燃氣（2688）則升40%，而鄭燃則只升13%，追落後又有計。
去年底鄭州出現「氣荒」，現時情況已有改善，西氣東輸供應源源不絕，公司就有「氣」應付愈來愈大嘅需求，盈利自不然可以逐級上升。重有一點，就係天然氣價格機制改革已啓動，鄭州氣價一向較其他地區為低，未來提價的幅度亦會較大。
郭兆誠