電影業近年唔係咁好景，皆因盜版猖獗，但剛剛用六十一億八千萬，向中信泰富買埋九龍塘又一城半數權益嘅太古地產，就唔係咁諗，佢哋重同安樂影片旗下嘅新達國際合作，一齊經營商場內嘅AMC又一城戲院。
AMC九八年開始進駐又一城，連小超電盈主席李澤楷都有幫襯。太古點解揀呢個場，同新達合作？擁有幾多權益？佢哋話不便透露。
講開太古商場內嘅戲院，蘭西記得，太古發言人上個月話，金鐘太古廣場嘅UA金鐘戲院暫時停業，進行裝修，加入一啲迎合市場需求嘅設施，點知原來第三季重開時，已經變咗由新達經營，改名AMC太古廣場。
市場消息人士話，UA金鐘停業後，太古同幾間院商洽談，最後交畀新達負責營運。新戲院共有六間電影院，比之前四間為多。太古交畀新達經營間戲院，自己唔插手。蘭西想知，究竟AMC又一城收入好啲，定係AMC太古廣場好數啲？
AMC娛樂係美國最大規模嘅影院營運商之一，AMC又一城同AMC太古廣場，係首兩間由新達取得經營權後管理嘅戲院。
電郵地址：[email protected]