連日大升的精熙國際（2788），終於在昨日回落，跌9％，收3.775元，但相比起招股價2.20元，仍然升超過7成，所以昨日雖然有人話隻股只係回氣唞一唞，但小初無膽量追入，皆因睇極都唔通。
經紀黃話，如果小初喜歡工業股，可以繼續留意奕達（2662）。早排經紀黃曾講過，如果日本前僱員的訴訟終結，奕達將有一番作為。雨過天青後，隻股表現果然OK，近排最高見過2.90元，昨日仍有2.85元。
半新股相對升得少
在日本前僱員官司影響之下，奕達上市之初，股價一度破底，但保薦人密密在市場接貨。當事件搞清楚後，芬佬紛紛重新買入奕達，而保薦人坐落的貨亦慢慢在市場沽出。雖然係咁，但無損股價升勢，反映隻股買盤大過沽盤，有唔少基金買入揸住。
經紀黃話，相對於其他炒到飛起的半新股，奕達落後好多，仍然有得諗。
奕達昨日平收2.85元，成交股數8326萬股，金額2364萬元。
慕容小初