張學友上年十二月喺台北小巨蛋演出音樂劇《雪狼湖》，首場演出時，學友因患重感冒，搞到個騷要中途腰斬。三號第二場學友就抱病撐到唱完場，宣布四、五、六號嘅三場延遲至十一至十三號先做，首場就會十號補畀啲觀眾，當時啲觀眾同歌迷都表現得好支持學友，重讚佢有專業精神，點知轉個頭，就話要學友賠錢。
遭觀眾投訴
台灣嘅消保會（類似香港消委會）因為接到觀眾二十幾宗投訴，話上年十二月三號學友死頂唱完嘅第二場表演失準，聲音沙啞，重有人話「前一晚張學友唱半場，該場觀眾就可以再看一次，我們卻甚麼都沒有」，消保會噚日開完會後，決定《雪》嘅主辦單位要對呢件事負責，台灣主辦單位超級圓頂就提議送《雪》嘅海報、杯作賠償，但消保會話唔得，要佢哋喺三月一號之前喺網上公告補償事宜，按比例賠錢畀當晚嘅觀眾，至於賠幾多，就由主辦單位決定。
《雪狼湖》製作單位負責人陳淑芬噚日喺電話度話：「成件事好專業咁做晒，每一場演出大家都交足功課，我唔明啲人重要complain（投訴）啲乜嘢。我哋身為製作單位亦冇乜嘢可以回應，最好大家問番台灣嘅主辦單位。」